“Ni ushindi mzuri lakini hatupaswi kuridhika nao”- Hans van der Pluijm

Pluijm amesema watatumia mechi za ligi ya Vodacom kujiandaa na mchezo huo wa marudiano ambao anajua utakuwa mgumu kutokana na kucheza ugenini

BAADA ya ushindi wa mabao 5-1 walioupata jana kwenye michuano ya Kombe la Shirikisho Afrika kocha wa Yanga Hans van der Pluijm, amesema matokeo hayo hayawapi muda wa kupumzika kwani bado wanakazi kubwa ya kuhakikisha wanamaliza vizuri dakika 90 za Zimbabwe.

Pluijm ameiambia Goal, wapinzani wao FC Platinum, ni timu nzuri na wanalazimika kucheza kwa umakini mkubwa kwenye mchezo wa marudiano utakaopigwa April 3 kwenye dimba la Mandava Zimbabwe.

“Niushindi mzuri lakini hatupaswi kuridhika nao tunapaswa kuendelea kujituma kwa kurekebisha mapungufu ambayo yamejitokeza na tutakapokwenda Zimbabwe tulinde ushindi wetu kwa kushambulia zaidi na siyo kuzuia kwa sababu wapinzani wetu FC Platinum ni wazuri,”amesema Pluijm

Pluijm amesema watatumia mechi za ligi ya Vodacom kujiandaa na mchezo huo wa marudiano ambao anajua utakuwa mgumu kutokana na kucheza ugenini na wapinzani wao nao wanahitaji kuwaonyesha kuwa wanaweza hivyo wanahitaji kufanya kazi ya ziada.